Sana..OO

Nagsimula sa ngiti
Nang makilala kita
Ang puso ko’y humuni
May pinararating ba?

Pagtingin ay umigting
Nang lalong makilala
Mga matang bituin
Oh kay ningning ng tala

Sa paglipas ng araw
Uuwi nang masaya
Ikaw ang laging tanaw
Ika’y mahal na kaya?

Kulitan dito’t roon
Hindi mapaghiwalay
Ang saya saya ngayon
Puso, tunay na nga ba?

Masaya ako noon
Kasama sa kulitan
Masaya ako ngayon
Walang hanggang tawanan.

Ngunit biglang nagbago
Ang tuwa ay tumumal
Ramdam ang ‘yong paglayo
Halata na ba, mahal?

Ang lihim na pag-irog
Isasambulat na ba?
Kagaya ba ng ilog?
Paaagusin na ba?

Minsa’y tila susuko
Itutuloy ko pa ba?
Tama nga ba ang ito?
Sige, susubukan na.

Ang hindi ko mawari
Takot sa aking dibdib
Ayusin ang sarili
Ilayo sa panganib

Pero sige, heto na
Handa nang ipagtapat
Pag-ibig, malaya na
Ayan na nga, salamat.

Walang inaasahan
Sana’y hindi masawi
Ayoko nang masaktan
Ang sakit ay mapawi

Oo nga ba o hindi?
Iyan ang katanungan
Mahal kita parati
‘Yan ang katotohanan.

-O